Bertsoaldi bikainak josi zituen Algortarrak. Buruz burukoan nagusitu zen eta berak irabazi zuen Bizkaiko Bertsolari finala. Bigarren Arkaitz Estiballes sailkatu zen. Amaierako agur hunkigarria abestu zuen Fredi Paiak.

Txapeldunaren agurra:

Barkatu Txato, Ardatz ta Arkaitz
heriotzaren krudela;
barkatu, Manex, Orkatz, Lexuri
gaur ondo irten zait kartzela;
barkatu, ama, Xabier ta Itsaso
ta nire lagun tropela.
Kanposantuan zin egin nuen
aitarentzat da txapela
berarengandik asko ikasi
ta jarraitzen dut horrela
hiru urte joan zinela
ta hala ere hemen zaudela
eta euskeraz eskeintzen dizut
gure artean ez bezela
itsasgizonen zeruan ziur
ikasiko zenuela.

Orain arteko finalik jendetsuena izan da aurtengoa. Antolatzaileen arabera, 4.350 lagun batu zire Bilbao Arenan. Zortzikoteak bere behar puntuagarria amaitu ostean, Arkaitz Estiballes eta Fredi Paia pasatu ziren buruz-burukora.

Arratsalde polita eta beroa izan zen. Umorea nagusitu zen eta jendeak ere horrela erantzun zuen. Fredi Paia Ruizek 901 puntu lortu zituen; Arkaitz Estiballes Ormaetxeak, 874.5. Hirugarren  Etxahun Lekue Etxebarria, 512 punturekin: Ondoren lau bertsolari sailkatu ziren lau puntuen barruan. Oihana Bartra Arenas, 482.5; Jone Uria Albizuri, 482; Onintza Enbeita Maguregi, 479 eta Iratxe Ibarra Foruria 478.5;  Xabat Galletebeitia Abaroa 452 lortu zituen bere lehenbiziko finalean.

Fredik lan dotorea osatu zuen kartzelako lanean. Eskua eman diozu gaiaren inguruan egin zituen hiru bertsoak daude hemen. Betelanean egindako ahalegina eta azken ideia gordetzearen indarra erakusten dute.

Poteoan edan baitut

atlantiko ozeanoa

urdindu da zirrotiko

nire gibel tiranoa

gibel berri behar dut

organo gazte sanoa

pertsona lasai batena

kirolari abstemioa

belarjale yogalari

mistiko monogamoa

beti entzuten duena

musika gregorianoa

beldur bat badut nirekin

eta azaltzera noa:

lehenago heldu leikela

elizako organoa.

Norbait behar dut, tik-tak

erlojuen sarkasmoa

itxaron zerrenda ikusi

ta Arkaitzen espasmoa

geroa bezain urruti

daukate kirofanoa

ta apurka itzaliz doa 

nire gibel dinamoa 

jada alokatu behar dut

hileta poligonoa

harrizko mausoleo ta

denetzako solomoa.

emailerik ez badator 

ta ordaindu barik banoa

nire patez pagaizue

hilkutxako ebanoa.

Ta hiltzen ari naiz ari

hau denboraren morrontza

lehen auto istripuak ziren

alkohola eta izotza

orain oso gutxi daude

azpimarratzeak lotsa

txikia da emaileen

ta organo libreen poltsa

baten bat atetik dator

bere sega bere hortza

garezur bat du buruan

eta hizketan ostotsa

aupa Heriotz zelan zabilz

hau nire logela motsa

aurkari ona izan zara

eman eskua Heriotza.